Madridning «Real» klubi yozgi transfer oynasida yana bir transferni amalga oshiradi. 

Avvalroq, «qaymoqranglilar» Jud Bellingem va Fran Garsiya bilan shartnoma imzolagan, shuningdek, Braim Diasni ijaradan qaytargan edi.

Endi «Qirollik klubi» Saudiya Arabistoniga ketgan Karim Benzemaga o‘rinbosar topishi kerak bo‘ladi. 

COPE xabariga ko‘ra, «Real»ning yozdagi so‘nggi xaridi «Espanol»ning 33 yoshli hujumchisi Xoselu bo‘ladi.

Manbaga ko‘ra, Xoselu La Ligadan tushib ketgan «Espanol»ni tark etadi. Uning sermahsulligini hisobga olgan holda, «Real» tajribali ispaniyalikni o‘z safiga qo‘shib olmoqchi. Shu bilan birga, avvalroq «galaktikos» Kilian Mbappe va Harri Keynga qiziqish bildirayotgani haqida xabar berilgandi. Ammo klub, ehtimol, Xoselu foydasiga yulduzlar bilan shartnoma imzolashdan voz kechsa kerak.

Xoselu 2022/23 mavsumi yakunlariga ko‘ra Ispaniya chempionati to‘purarlar poygasida uchinchi o‘rinni egalladi. U La Ligadagi autsayderi tarkibida 16 ta gol (Benzemadan 3 ta kam) urdi.