Italiyalik mutaxassis Antonio Konte kelajakda yana murabbiylik qilishi mumkinligini aytdi.

«Tottenhem» va «Yuventus»ning sobiq ustozi faqat qiziqarli loyiha bo‘yicha taklifni qabul qilishi mumkin.

«Murabbiylik qilish istagi har doim bor – aks holda bu ishni tashlagan bo‘lardim. Shunday bo‘lsa-da, mukkasidan ketib ish qidirmayapman. Agar loyiha haqiqatdan ham hayratlanarli bo‘lsa, taklifni ko‘rib chiqishim mumkin. Men Italiyada ham, xorijda ham ishlashga tayyorman», deb Konte so‘zlarini keltirdi Tuttomercatoweb.

Avvalroq, «Yuventus» Massimiliano Allegri bilan xayrlashsa, Konte bosh murabbiy bo‘lishi mumkinligi haqida xabar berilgan edi.

Eslatib o‘tamiz, Antonio Kontening so‘nggi ish joyi «Tottenhem» klubi bo‘lib turibdi. Italiyalik mutaxassis 2021-2023 yillarda London klubini boshqardi.