Randal Kolo-Muani «Ayntraxt»dan «Bavariya»ga o‘tmoqchi. 

Sport1.de xabariga ko‘ra, 24 yoshli hujumchining Myunxen klubiga simpatiyasi bor. U uchun «Bavariya»ga o‘tish «Manchester Yunayted» yoki «PSJ»ga ketishdan afzalroq. 

Gap shundaki, Randal Bundesligada o‘ynashni yaxshi ko‘radi. U boshqa chempionatga o‘tishni xohlamayapti. Shuningdek, uni «Bavariya»ning yuqori darajadagi ambitsiyalari va jamoaning kuchliligi hayratda qoldiradi. 

Kolo-Muanining Fransiya milliy jamoasidagi sheriklaridan 4 nafari Myunxen klubida o‘ynaydi — Dayo Upamekano, Benjamen Pavar, Luka Ernandes va Kinsli Koman. Shuningdek, jamoada fransuz tilida so‘zlashuvchi boshqa futbolchilar ham bor — Sadio Mane, Nussair Mazraui, Buna Sarr, Yan Zommer va Erik-Maksim Shupo-Moting. 

Kolo-Muani Upamekano bilan do‘st. Manbaga ko‘ra, bir necha oy oldin himoyachi hujumchi bilan «Bavariya»ga o‘tishni muhokama qilgan va unga «Agar shunday davom etsang, tez orada bizda o‘ynaysan!» degan. 

Frankfurt klubi hujumchi uchun taxminan 100 mln yevro talab qiladi. 

Xabar qilinishicha, «Bavariya»ning short-listida nafaqat Kolo-Muani, balki Harri Keyn («Tottenhem») va Viktor Osimhen («Napoli») ham bor.

Bu mavsumda fransiyalik forvard klub safida 36ta o‘yinda 17ta gol urdi va 12ta golli uzatmani amalga oshirdi.